Dagneja Ups, kūki i mes

Dagneja

Ups, kūki i mes

Meikstī vuoki, 88 puslopys, 12 x 17 cm

Redaktore: Vija Laganovska

Muokslineica: Dana Vasiļjeva.

Izdeviejs: Latgalīšu kulturys kusteiba “Volūda” (biedrība “LgSC”)

Dagneja aba eistajā vuordā Dagneja Dudarjonoka dzeju latgaliski roksta jau seņ, tok itys ir autoris pyrmais dzejis kruojums. Da ituo Dagnejis dzeja ir publicāta kūpkruojumūs, par pīmāru, myusdīnu latgalīšu dzejis antologeja “Susātivs” (2008), “Linejis” (2016) i cytūs, kai ari škārsteiklā, bet dzejis kruojumā “Ups, kūki i mes” apkūpuoti vaira nakai 70 dzejūli. Itymūs dzejūļūs Dagneja raudzejuse kaituotīs (spēlētīs) ar dažaidu volūdu vuordim i simbolim, salīkūt sūpluok jiutu, pruota, piļsātys, lauku, realuos i digitaluos dzeivis paruodeibys i nūtikšonys. Dzejūli raksteiti latgalīšu literarajā volūdā, tok sovu reizi volūdā īsaskaņ ari Dagnejis dzymtuo – Vuorkovys puse.

Dagnejis dzejūli ir sižetiski – kai ba runojūt par kasdīnys nūtykumim, autore pīsaskar ari filozofiskim vaicuojumim par laiku, dzeivis jāgu, ari par mīlesteibu pret ūtru cylvāku i dažaidom Latgolys vītom. Kruojumam atlaseitajā dzejūļu kūpā autore rauga raksteit par attīceibom, par kūpeigū i atškireigū piļsātā i laukūs, par cylvāku i juo apleicejuos vidis saisteibu, nasabeistūt lītuot ari myusdīneigus i dažaiduos volūduos raksteitus vuordus.

Par sovu pyrmū dzejis kruojumu “Ups, kūki i mes” Dagneja soka: “Asu pateiceiga vysim, kuri koč kaidā veidā pīsadalejuši itūs dzejūļu radeišonā. Kruojumā sasalykuši dzejūli, kas raksteiti pādejūs pīcūs godūs, tok ir ari pa kaidam maņ meilam dzejūļam, kas atrads sovu vītu kruojumā vēļ nu agruoku laiku. Teksti taipat kai es ir kusteigi i kruosaini. Kaids sovu reizi paboksta skaiteituoju pruotu, cyts ir ari pīturzeimem, kab precizuok puorskaiteitu munu dūmu, bet cyts pamasts ar vītu kotra poša breivai interpretacejai.”

www.lakuga.lv